Það að Vináttuhlaupið væri senn á enda sveif yfir vötnum í dag, svo og það að Vináttuhlaupararnir þurftu að hlaupa einir 115 km. Hinsvegar höfðu nokkrir hlauparar komið úr Reykjavík og saman unnu margar hendur (eða margir fætur í þessu tilfelli) létt verk. Veður var annars gott til hlaups, það var nokkur vindur, en milt og lítil rigning, enda gekk greiðlega að hlaupa.

Við urðum vör við nokkuð mikla umferð úr bænum, enda margir sjálfsagt að leggja upp í sumar- eða helgarfrí frá Reykjavík. Einnig tókum var þung umferð fuglsunga á veginum, en þeir voru aðallega í því að hlaupa undan okkur.

Á hádegi var komið upp á Holtavörðuheiði og sást þá vel til Eiríksjökuls og Langjökuls og gnæfði Trölladyngja yfir. Þaðan var hlaupið yfir í Norðurárdal og fékk Ganagane það verkefni að bera kyndilinn og fannst honum það sérdeilis ánægjulegt, enda á hann ættir að rekja hingað og fæddist afi hans t.a.m. á kirkjustaðnum Hvammi. Ganagane gat því rifjað upp æskusumur sín og minntist með sérstakri ánægju ýmissa gönguferða og rollusmölunar.

Að því loknu var hlaupið áfram inn í Borgarnes. Fóru þá nokkrir hlauparar með Frank til Reykjavíkur, en hann átti flug aftur til Hollands eldsnemma morguninn eftir, og var haldið kvöldverðarteiti Frank til heiðurs. Kvöddum við Frank með söknuði, en hann hefur sannarlega reynst betri en enginn og hefur ást hans á Íslandi orðið okkur hinum innblástur og hvatning.

Harmonemail:
You can send a message to the runners or read the messages.