Viku eftir að World Harmony Vináttuhlaupinu hringinn í kringum Ísland lauk, söfnuðust Vináttuhlauparar saman í Hljómskálagarðinum, þar sem hringhlaupinu lauk. Ekki var ætlunin að leggja upp í viðlíka hlaup að þessu sinni, heldur var hlaupið beinustu leið í snekkjuna Explorer sem lá við Reykjavíkurhöfn.

Þar var tekið á móti okkur með virktum af heimskautaleiðangrinum Students On Ice , en leiðangur þessi, sem lét úr höfn síðar um kvöldið í tveggja vikna ferðalag um Ísland, Grænland og norðurslóðir Kanada, tók við Vináttukyndlinum og mun reyna að koma því við sem mest hann má að hlaupa með hann í bæjarfélögunum sem hann heimsækir.

Það er forsvarsmaður leiðangursins, Kanadamaðurinn Geoff Green, sem stendur fyrir þessu samstarfi, en hann er World Harmony Vináttuhlaupinu góðu kunnur og tók þátt í því í Ottawa, Kanada, 2. júní síðastliðinn.

Geoff Green bauð Vináttuhlaupurunum að halda stutta kynningu um World Harmony Vináttuhlaupið fyrir leiðangursmenn Students On Ice, en það eru annarsvegar nemendur á aldrinum 14-19 ára og hinsvegar fullorðnir vísindamenn og sérfræðingar á ýmsum sviðum. Þar á meðal er einn Íslendingur, hinn 17 ára gamli Ole Nordman Brynjólfsson, en móðir hans, Selma, er einmitt einn af Vináttuhlaupurunum.

Ganagane tók að sér að sjá um kynninguna og fórst honum það vel úr hendi eins og hans er von og vísa.

Geoff Green sagði í greinargóðri ræðu sinni vera stoltur að fá að bera Vináttukyndilinn í gegnum þrjú heimskautalönd og að hann hlakkaði til þess. Hann sagði ennfremur að leiðangurinn Students on Ice snerist um margt, svo sem ævintýri, nám og umhverfið, og að það að láta hann nú líka snúast um frið og vináttu væri harla góð viðbót. Tóku leiðangursmenn vel undir þau orð.

Að kynningunni lokinni skyldum við Vináttukyndilinn eftir í góðum höndum Greens og félaga og vonum bara að Students On Ice fái tækifæri til að hlaupa sem mest með hann.

Students On Ice verða á Grænlandi 28.-30. júlí og þá verður vonandi hægt að fylgjast með Vináttukyndlinum á Grænlandsheimasíðu hlaupsins.

Einnig viljum við benda á heimasíðu Students on Ice .

Þar er hægt að fræðast meira um Students on Ice

og fylgjast með ferð þeirra .

Harmonemail:
You can send a message to the runners or read the messages.